TAROTPÓSTURINN NR. 2 - 28. nóvember 2001
Töfrar og Töframaðurinn í Tarot.
Mér brá alveg hryllilega nú í vikunni sem leið. Þetta kom svo óvænt,
og það um miðja nótt þegar allt var hljótt og dimmt. Ég átti von á
dauða mínum, en ekki þessu. Þetta var aðfararnótt mánudagsins
19. nóv. og var ég búin að sitja lengi við tölvuna, eins og vanalega,
langt fram á nótt.
Það kemur maður tiplandi inná tölvuskjáinn hjá mér. Bara si svona!
Ég hélt ég yrði ekki eldri. Ég veit að tölvan er eins og lifandi vera þegar
nettengingin er í gangi: 'LJÓSlifandi' póstur dettur inn í pósthólfið,
borðar blikka og fígúrur fálma í allar áttir.
En þetta!
Hann gengur þarna inn, og staldrar við, hægra megin á skjánum.
"Halló vinurinn ... " segi ég í huganum, "hvað er í gangi - og hvað svo?"
Hann stendur grafkyrr.
Þar sem ekkert gerist prófa ég að klikka á karlinn með músinni.
En hann haggast ekki.
Ég skoða fyrirbærið betur: hann er svartklæddur og heldur á bakka.
Hélt nefnilega fyrst að svört padda væri að skríða inná skjáinn,
þess vegna brá mér svona hryllilega.
Á bakkanum liggur hvítt umslag. "Já auðvitað! Þetta er þjónn!" hugsa ég.
"Heyrðu!" segi ég við sjálfa mig í huganum. "Er ekki bara verið að auglýsa
nýjustu bókina hans Ólafs Jóhanns Ólafssonar, þar sem ein af
aðalpersónunum er kaupsýslumaður sem hvarf til USA og gerðist "butler"
hjá amerískum auðkýfingi?" Og fyrirmyndin að aðalpersónu bókarinnar
bara látinn mæta á svæðið!
Ég hafði verið að lesa grein í mogganum þann 17. nóv. um að sagan byggi
á raunverulegu fólki og þjónninn í tölvunni er mjög líkur myndinni af Árna Ben.
sem hvarf úr 'Höll minninganna' á Stýrimannastígnum uppúr
síðustu aldamótum.
Tölvan er þvílíkt töfratæki. Að geta sent manni einhvern í heimsókn
til að auglýsa bók eða eitthvað!
Þá kom Tromp I í Tarotspilunum upp í hugann: það er Töframaðurinn.
Myndin af honum á Rider Waite Tarotspilunum lítur svona út:
 |
Ímynd Töframannsins er sá sem er í fararbroddi.
Sá sem tekur af skarið og framkvæmir. Á borðinu
fyrir framan hann er allt sem hann þarf: vöndur, bikar, sverð og diskur.
Þetta er seiðmaður sem getur látið allt gerast. Þessi ímynd tengist einnig töframanninum sem sýnir listir sínar á sviði, eins og t.d. Houdini. Eða galdrakarlinum í OZ. Hann hefur mikil völd og lítur á sig sem boðbera. Í dag koma þessi boð eftir ljósleiðurum og breiðböndum, beint inn í tölvuna hjá okkur. |
Trompið Töframaðurinn er ekki lengur 'bara' valdamikill galdrakarl: þetta er nútímalegur og framsækinn tölvusérfræðingur. Tölvugúrú. En hvað hefur breyst? Jú, þetta:
1. Töfrasprotinn eða Vöndurinn er orðinn að tölvu: nú spretta ekki lengur loðnar kanínur uppúr pípuhöttum, heldur birtist 'lifandi' fólk á tölvuskjánum.
2. Sverðið er tákn um nám og þekkingu Töframannsins.
3. Bikarinn táknar þær tilfinningar sem hann setur í verk sín; öll þessi 'töfraforrit' sem eru í boði. Bikarinn felur einnig í sér atvinnuleyndarmál hans.
4. Diskurinn, stundum kallaður skildingur, táknar launin hans og það sem hann uppsker af starfi sínu.
YrsaBjörg, spá- og leiðsagnarmiðill www.tarot.is
===============================================
Í síðasta Tarotpósti skoðaði spámiðillinn Tarotspilið "Hirðfíflið" sem hefur 'byrjunartöluna' núll. Tákn um nýja byrjun. Skoðaðu Tarotspil japanska doktorsins Shigeki Gomi og sjáðu hvernig hann sér fyrir sér nýja byrjun í Trompi 0 og hvernig hann sér Töframanninn, Tromp 1.
Spilin voru útgefin í Japan 1982: - Skoðaðu spilin!
===============================================