TAROTPÓSTURINN Nr. 3 - 7. febrúar 2002

Baráttan um brauðið

Tarotspilið Vanda Fimman er hvatinn að þema þessa pósts.

Í síðasta pósti varð mér tíðrætt um þjóninn sem mætti inná tölvuskjáinn minn í lok nóvember. Þegar allt kom til alls, var alls ekki verið að auglýsa bókina hans Ólafs Jóhanns, heldur fylgdi karlinn með póstforriti sem ég hafði náð mér í á síðunni www.bravenet.com Ekki hafði ég hugmynd um að karl fylgdi með!

En það var alls ekki tekið út með sældinni að vera með tvö póstforrit í sömu tölvunni vegna þess að það kallaði á samkeppni milli þeirra. Þetta nýja, tók til sín hluta af póstinum sem barst, þótt ég hefði ekki óskað eftir því. Vildi fá allan póst inní þetta 'gamla.'

Þarna var komin samkeppni í gang og mér fannst frekar tímafrekt að stökkva milli pósthólfa til að lesa póst. Og svo var karlinn alltaf að koma inná skjáinn með bréfa-bakkann, þannig að það var aldrei friður. Og yfirleitt brá mér þegar hann læddist inná skjáinn, svartklæddur, eins og lítð skrímsli.

Satt best að segja var orðið þreytandi að horfa uppá baráttu og samkeppni póstforritanna. Og mikið óskaplega væri þreytandi að hafa alvöru þjón yfir sér í tíma og ótíma. Þá er skárra að berjast sjálfur og svitna í húsverkunum.

En Tarotspilið Vanda fimman táknar einmitt baráttu og samkeppni. Myndin af spilinu tilheyrir Rider-Waite Tarotspilunum:

Fólkið á myndinni sýnist vera í eins konar baráttu. Það er kófsveitt við að koma staurunum fyrir. Kannski er fólkið að slást um eitthvað? Eða laga til á byggingarlóð, eða setja upp tjald fyrir garðveislu? Hver veit? Þau munu a.m.k. verða búin að missa nokkur grömm þegar þú hefur lokið við að lesa þennan póst! En ég las einhvers staðar um daginn að einhver Tarotlesari kallar þetta spil 'megrunarspilið'!

Ég nota titilinn 'Baráttan um brauðið' á þennan pistil, sem er fenginn að láni eftir samnefndri sjálfsævisögu Tryggva Emilssonar, en þegar hann var lítill var lítið um mat.

Núna hefur dæmið snúist við - allir berjast við aukakílóin; í þjóðfélagi þar sem gómsætar pizzur hafa tekið við af trosinu. Jafnvel þarf sjálfur forsætisráðherrann að berjast við grömmin. Göngutúr með hundinn nægir víst ekki lengur! Maður hefði haldið að baráttan við efnahagsástandið ætti að duga til að svitna um nokkur grömm á dag!

En hvað sem peningamálunum líður, væri e.t.v. réttara að kalla þennan pistil og Tarotspilið sjálft: 'Baráttuna við brauðið.'

YrsaBjörg spámiðill www.tarot.is

Hægt er að komast í samband við Yrsu í síma 908-6414 (199.90 mín.) flesta daga og kvöld vikunnar. Ath. að ódýrara mínútugjald (129.90) er í síma 908-2288 milli kl. 10 og 13 á daginn.