TAROTPÓSTURINN Nr. 5 - Júlí 2002

ELDHÚS TAROT - Spákonan Yrsa:

Hvað kemur Tarot eldhúsinu eiginlega við? Ekkert svosem, nema að þeir sem eru að stúdera spilin og tengjast þeim, ættu að stilla "spili dagsins" upp á góðum stað í eldhúsinu, á meðan verið er að fást við matseldina og uppvaskið.

Um daginn þurfti ég að fletta upp gamalli grein í Eldhúsbókinni, en þessi bók er mappa með litskrúðugum lausblöðum, sem var gefin út hér fyrir mörgum árum. Var mér boðin áskrift að þessu þegar ég var nýbyrjuð að búa, og er passað vel uppá möppuna, þannig að hún sé alltaf aðgengileg.

En hvað með það, þegar ég var að fletta í möppunni, datt mér strax í hug eldhús-tarotspil sem ég hafði séð á netinu. Fyrsta spilið í syrpunni lítur svona út, en þetta er þá auðvitað Tromp 0, sem samsvarar Hirðfíflinu:

Af hverju skyldi höfundur spilanna láta byrjunarspilið hafa vatnskrana sem tákn? Jú, t.d. í mörgum goðsögnum um sköpun heimsins er vatnið aðalvökvinn sem skapar líf. Þannig er vatnið bæði tákn um líf og frjósemi. Í eldhúsinu getum við útbúið mat, og er vatnið auðvitað ómissandi í allri matargerð - það er lífgjafi.

Listakonan lætur sigtið eða réttara sagt málmsáldið ("colander") vera aðaltáknið, þar sem það hefur þá eiginleika að geta látið vatnið renna beint í gegn og hefur þess vegna mikla hreinsunareiginleika.

Vatnið er ekki einungis tákn um nýja byrjun, heldur einnig endi: þegar ský ljúka sínu hlutverki, gufa þau upp og verða að vatni. Dagurinn endar á því að sólin sest í sæinn. Og við gætum ekki dregið fram lífið án vatns. Svo er sagt að vatnsdrykkja lengi lífið!

En það sem er sérstakt við þessi spil, er að þau eru í rauninni bútasaumsmyndir. Hægt er að kaupa eitt og eitt spil, til að safna. Hvert spil er áritað, númerað og dagsett.

Og hvað haldið þið svo að séu tákn á Trompi III Keisaradrottningunni og Trompi IV Keisaranum? Hvað annað en eldavél og ísskápur!

Veffang listakonunnar Lucky Magnilia (aka Susan Shie) er:

http://www.turtlemoon.com/stuff/kitchen.htm

Eftirfarandi grein fann ég í gömlu góðu Eldhúsbókinni:

HVERNIG ÞÉR GETIÐ LENGT LÍF EIGINMANNSINS!
Fjórir af hverjum fimm sjúklingum, sem fá hjartaslag, eru karlmenn. Þér, sem eiginkona, getið gegnt mikilvægu hlutverki í að vernda heilsu manns yðar. Til allrar hamingju eru til ýmsar varúðarráðstafanir, sem hægt er að gera, og fara hér á eftir 7 þær helstu:

1. VERIÐ GLAÐLEG Í VIÐMÓTI
Takið hlýlega og glaðlega á móti eiginmanninum þegar hann kemur heim. Flestir menn verða fyrir svo og svo mikilli taugaspennu í sínum daglegu störfum, svo að æskilegt væri, að þeir gætu slappað af á heimilum sínum og byggt upp kraftana.

2. HAFIÐ MÁLTÍÐIRNAR LJÚFFENGAR
og hollar, en forðist samtímis fitandi mat, svo að þið getið haldið ykkur grönnum. Og notið umfram allt ekki matmálstímana í umkvartanir og vandamál.

3. HLAÐIÐ EKKI Á HANN
samkvæmislífi á vinnudögum, svo að hann fái að minnsta kosti 7-8 stunda nætursvefn.

4. MIKIL HREYFING
er nauðsynleg. Hvetjið eiginmann yðar til þess að ganga eins mikið og unnt er. Farið í göngur saman. Stutt kvöldganga t.d. er hinn ágætasti svefngjafi.

5. VERIÐ EKKI EYÐSLUSÖM
Áhyggjur og taugastríð út af óhóflegu heimilishaldi geta verið heilsunni hættulegri en viðskiptavandamálin.

6. ÞAÐ ER MIKILSVERT
að fara í frí með reglulegu millibili. Notadrýgst verður fríið ef það er með breyttum hraða frá hversdagslífinu, ef breytt er um landslag og það verður ekki of mikið skarð í fjárhaginn.

7. SJÁIÐ UM
að maðurinn yðar fari í hjartarannsókn a.m.k. einu sinni á ári.

Heimild: Eldhúsbókin, janúar 1967

YrsaBjörg spámiðill www.tarot.is

Hægt er að komast í samband við Yrsu í síma 908-6414 (199.90 mín.) flesta daga og kvöld vikunnar. Ath. að ódýrara mínútugjald (129.90) er í síma 908-2288 milli kl. 10 og 13 á daginn.